KA’AY

KA’AY

Ohai: David Galeano Olivera

Leer original (hacer clic) en (http://cafehistoria.ning.com/profiles/blogs/ka-ay)

Leer también en (http://lenguaguarani.blogspot.com/2016/06/kaay_12.html)

Asimismo leer en (https://dgaleanolivera.wordpress.com/2016/06/12/kaay/)

I

Amoite okaháre

Ha táva guasúpe

Peteî mba’énte

Ñanembojoja

Ko’êmi jave

Jaheka chupe

Ñande retemi

Ombyaku haĝua

Upévako hína

Che rapichakuéra

Ku ka’aymi

Hyjúi hyjuipáva

Kuarahy pytúndi

Ombohetia’éva

Mayma tapichápe

 

II

Ku ro’y jave

Heta yvypóra

Heko mboriahúva

Ikatumiháicha

Tuicha oñeha’â

Ro’y ombotavy.

Ko’ê mboyvemi

Oîma opu’âva

Ha tataypýpe

Oho ojepe’e

Tata ohapyña

Tuicha ojepota

Pya’éma omoî

Ku páva hûmi

Mbeguemi pe y

Opupu ohóvo

Sy ha tuvami,

Tamói ha jarýi

Apykape ári

Tatami jerére

Iko’êjeýma

Maitei rory

Ojupe ome’ê

Tupâ reraitépe

Ára oñepyrû

III

Ku imitâvéva

Oitykuava’erâ

Ha peteîteîme

Ogueropojái

Tamói ha jarýi

Jepiverôguáicha

Ka’ay oha’â

Ha jepe opupu

Ijurupekuéra

Ne’írâ haku

Péichango iko’ê

Ñane retâygua

Ka’ay ipópe

Amo arasême

Hesami omoî

Ohecha haĝua

Kuarahy resê

Ipytu akúpe

Ombyaku añetéta

Yvy, ñande róga

Ka’aru ipytûvo

Kuarahy oñemívo

Jahechajeýta

Tataypy jerére

Ñane pehêngue

Ka’ay ipópe

Korasô rorýpe

Ñande Rupavême

Aguyje ome’êta

Jepiverôguáicha

Ko ára oĝuahêre

Ijapypemi

  

ooo000ooo

Leer AJÉPA RO’Y, en (http://lenguaguarani.blogspot.com/2016/06/ajepa-roy.html)

Leer TUPÂ, en (http://lenguaguarani.blogspot.com/2016/06/tupa_12.html)

Leer MBORIAHU PÓNCHO, en (http://lenguaguarani.blogspot.com/2016/06/mboriahu-poncho_12.html)