PARAGUAY, CHE RETÂ

PARAGUAY, CHE RETÂ

Ohai: David Galeano Olivera

Leer original (hacer clic) en (http://cafehistoria.ning.com/profiles/blogs/paraguay-che-ret)

Leer también en (http://lenguaguarani.blogspot.com/2015/01/paraguay-che-reta.html)

I

Paraguay, che retâ

Che chereñói ndepype

Ha nde nereñói chepype.

Ndéniko che retâ,

Che yvy,

Che rekoha,

Che róga,

Che vy’aha.

Ndepype

Añeñandu,

Akakuaa

Ha aiko

Py’arory,

Py’aguapy

Ha mborayhu pópe.

Che ñe’âme romohenda,

Upépe roñandu

Che ruguýre resyry

Remoingove che reko.

Opárupi asapukái

Cheaguaraha nderehe

Nde ha’égui che retâ

Ñande Ru remimoî

Arapy rechapyrâ.

Ha, Paraguay, che retâ

Che chereñói ndepype

Ha nde nereñói chepype.

 

II

Yvy pytâ

Guarani retâ

Amérika rapo

Tupâ mba’e rakate’ŷha.

Ndéngo ha’ehína

Kuarahy rupa;

Ha’e overa,

Omimbi

Ha ojajaihápe,

Ipytu akúpe

Ombo’ajupáva

Mayma temitŷ

Ha kogamimi.

Paraguay, che retâ

Nde yvy niko

Ipiro’y, hesâi, hetia’e

Nde nerenyhê

Kuimba’e ha kuña

Rekokatuetégui,

Nderayhu añetéva

Ha kane’ô’ŷre

Nderehehaitépe

Hekove ome’êva

Ikatuhaĝuáicha

Ko’ê ko’êvére

Nembotuichave.

Umívako hina

Oikuaa porâ

Ne rembiasakue

Tuicha mba’eha,

Ipype orekógui

Mba’e porâita

Ha ijetu’úva,

Tembiasa asy,

Heta ne memby

Omanohaguépe.

Umíva apytépe

Mokôi ñorairô

Nera’âhaguépe

Ndejukahaĝuáicha.

Heta nde ruguy

Upérô osyry

Ojaho’ipáva

Ha omopytâva

Ko ñande yvy

Ha jepémo upéicha

Nde neremanói,

Nembareteve uvei epytávo,

Nde kusuguemígui

Reikovejey.

Ha, Paraguay, che retâ

Yvy pytâ

Guarani retâ

Amérika rapo

Tupâ mba’e rakate’ŷha.

 

III

Ndepype ára ahecha

Ndepype chekarai

Ha peteî ára

-Ñande Ru cherenói vove-

Ndepype tache’arapahaĝuahê.

Ha, Paraguay, che retâ

Nderéra ha’évo

Vy’apavê cheañuvâ

Ha heta nera’ânga

Che apytu’û rupi ohasa,

Opavavénte iporâ,

Opavavénte ahayhu,

Ndorekói hupytyha.

Nde poyvi marangatu

Mbohapy isa’ýpe he’i:

Pytâ, tekojoja

Morotî, py’aguapy

Hovy, tekosâso

Amo yvate yvatevehápe

Yvytu ndive oveve

Ha arapýpe ojajái.

Nde yvága rovyasy

Nde kuarahy itajumeme

Ne ñasâindy kangy asy

Nde jasymi ipajéva

Mamópa oime

Umíva joguaharâ.

Mymbamimi opaichagua

Ha guyra ijayvuetéva

Omoingove ha ombovy’áva

Ne ñu ha ka’aguy,

Yvyra puku puku

Ha yvotyeta hechapyrâ

Ñande rape omohembe’y

Ha ñane retâmi ombojegua.

Nde yvu, ykua ha ysyry

Piro’ýpe y’uhéi ombogue.

Ne rembi’u opaichagua:

So’o apu’â, saporo,

Jopara ha kyrype,

Mbeju ha chipami

Akóinte ombohovái

Ñembyahýi ha vare’a.

Ne mba’ejegua hetaitéva

Ojoasapáva porâme:

Typói ha ñanduti,

Aopo’i ha poyvi,

Okaraygua rembiapo

Maymáva resahoha.

Nde purahéi jojaha’ŷ

Nde jeroky ijaguaráva

Nde terere ro’ysâ

Henyhêva ñana rykuégui:

Arahaku, pirevai

Ha kane’ô ombohasáva.

Avei oime upérupi

Jepokuaa porâite,

Ñembosarái horyetéva

Káso ñemombe’u:

Pombéro, póra,

Jasy Jatereguigua,

Ha ñe’ênga arandu

Nde rekoite ohechaukáva

Ndorekói hupytyha.

Ipahápe ĝuarâ aheja

Upe nde rekove sâ

Nde ypy ha nde apy

Hese’ŷ nde ndereikói

Upéva niko ha’e

Ñane ñe’ê Guarani

Ayvu porâite asy

Ñande Ru pytu añetéva

Ojapóva ndehegui

Tetâ ijoguaha’ŷva.

Ha, Paraguay, che retâ

Ndepype ára ahecha

Ndepype chekarai

Ha peteî ára

-Ñande Ru cherenói vove-

Ndepype tache’arapahaĝuahê.

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s