12 DE JUNIO – CHE RU CHAKORE

CHE RU CHAKORE

Ohai: David Galeano Olivera

Leer original (hacer clic) en (http://cafehistoria.ning.com/profiles/blogs/12-de-junio-che-ru-chakore)

Leer también en (http://lenguaguarani.blogspot.com/2014/06/12-de-junio-che-ru-chakor…)

I

Che ru Chakore
Péina aju ko ára
Romomaitei ha romomorâ
Ahecharamo nde rapykuere
Leô Guarani
Nderehe ae ko ñane retâ
Omimbi, ojajai
Ko yvága guýpe

Ha oho tenonde

Vy’apavê piári

Ára opa peve.

Mbohapy ary

Reiko ñorâirôme

Rehasa asy,

Tuguy reñohê

Nereñakâitýi,

Nereñeme’êi,

Ku mymba ñarôicha

Reñeñanduka

Ha rehechauka

Kóva ha’eha

Nde ru ha nde sy

Yvy teete.

Che ru Chakore
Péina aju ko ára
Romomaitei ha romomorâ

II

Ko’ê ko’êvére
Rejetyvyro ko’ápe ha pépe

Tetâ rayhupápe

Aniete haĝua

Ko ñande yvy

Porâite asy,

Ho’a, omano,

Ha ikusuguepa

Umi moñái pópe,

Ha hendive, ñande

-Tyre’ŷ poguýpe-

Japa, jaje’o

Ko yvága guýgui.

Aguyje ame’êta

Amano meve

Rojas Silva, Franco,

Caballero Irala,

Ha Estigarribia,

Jakare Valija

Ha Emiliano R-pe

Pyti’a omoîre

Omo’â haĝua

Ñane retâmi.

Reku’e upérô,

Che ru Chakore,

Tetâ rayhupápe

Remuña, reity

Ko ñande yvýgui

Umi pytaguápe

Ha remopotî ha

Remomimbi

Guarani ruguy.

Ko’ê ko’êvére
Rejetyvyro ko’ápe ha pépe

Tetâ rayhupápe

III

Che ru Chakore

Yvy rupi reiko
Ha ndereikuaái

Y’uhéi, Kane’ô,

Mbyry’ái, ro’y

Ne akâme oîgui

Peteî mba’énte:

Mborayhu añete

Ha ijojaha’ŷva
Ko ñane retâre.

Nde ruguy opyta

Chako guasuetepe

Boquerón, Corrales,

Toledo, Nanawa,

Campo Vía, Ingavi

Ha ambue tenda rupi

Ohechauka haĝua

Ko yvorayguápe

Kóva ha’eha Paraguay yvy

Che ru Chakore

Yvy rupi reiko
Ha ndereikuaái

Y’uhei, Kane’ô,

Mbyry’ái, ro’y

IV

Ara guasuetépe

Ko ne renondépe

Péina añembo’y

Ha ndéve añakâitývo

Mokôive che pópe

Tesay pa’ûme ajepopete

Ahechakuaávo

Mba’e guasuete

Rejapova’ekue

Reipotágui akóinte

Ko ñane retâ

Hekove sâso
Ha ñande, maymáva,

Tajaikojoa

Mborayhu, vy’a

Ha tekokatúpe.

Ahecharamógui nde reko pyapy

Ara guasuetépe

Ko ne renondépe

Péina añembo’y

Ha ndéve añakâitývo

Mokôive che pópe

Tesay pa’ûme ajepopete

(Ahechakuaávo Lino Galeano-pe, che ramói, Cháko-pe oñorairôva’ekue – En memoria de mi abuelo, Lino Galeano, ex combatiente de la Guerra del Chaco)

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s